ئىچىدە سوققان يۈرەكنى ھېس قىلغىنىدا شۈكرى ئېيتتى،
ئىچىدە سوققان يەنە بىر يۈرەكنى ھېس قىلغىنىدا ھەمدى ئېيتتى،
ئۇ كىچىك يۈرەك تېشىدا سوقۇشقا باشلىغىنىدا
ئۇنىڭدىن تارىغان جەننەت ھىدىنى قېنىپ سۈمۈردى،
جەننەت ئۆستىڭىگە تۇتاشقان كۆكسىدىن مېھىر بىلەن ئېمىتتى.

ئانا رەھمىدىن يوچۇن زېمىنغا مېھمان بوپ كەلگەن
كىچىككىنە تەن.
تولغاق ئازابى ئۇنتۇلدى بىردىن
«ئىڭڭە» بىلەن تەڭ.

بال ئۆستىڭى ھەم سۈت ئۆستىڭىنى
سۈمۈرۈپ تەڭلا ئانا كۆكسىدىن،
گۇڭراشلىرىدا دەمدىكىن بوۋاق:

ئانا قۇچىقى
ھۇزۇرلۇق ۋەتەن،
ھۇزۇرلۇق ۋەتەن.