پاجىئە
ئەخمەق قىزلار، بىخۇت يىگىتلەر،
چىرماشماقتا مەڭگۈلۈك ئازاب.
شەيتان تارتۇق قىلغان ۋەسۋەسە-
شەھۋەت، توزان باسقان ئېتىكاپ.
«پىدائىلار» مارشى
خۇرسىنىپ يۈرمەيلى، ئويناپ كۈلەيلى،
باشقا نە كەلسە گەر بىللە كۆرەيلى.
ئۇھسىنىش نە ھاجەت باھاردا دوستلار،
قىشتىنمۇ قۇتۇلدۇق كۆپ شۈكرى دەيلى.
دەرت كەلسە باشقا گەر شاتلىق بىلەيلى،
ئازابنى يوشۇرۇپ خەققە دېمەيلى.
ئوندىن پەس بولساق بىز ئوندىن ئېگىزغۇ،
ئارقىدا قالدىم دەپ غەممۇ يېمەيلى.
كىيىمنى پەرەڭدەك مودا كىيەيلى،
ئەجدادىم ئۇلۇغ دەپ مەغرۇر يۈرەيلى.
رېستوران – كۇلۇبلار بىز ئۈچۈن ئوچۇق،
بىردەملىك بولسىمۇ دەۋران سۈرەيلى.
ئوينايلى، شاتلىققا، قۇتقا چۈمەيلى،
قايغۇنى يۈرەككە چوڭقۇر كۆمەيلى.
ئارماننى ئۇزىتىپ يىراق – يىراققا،
ئۆلسەكمۇ قاقاھلاپ كۈلۈپ ئۆلەيلى.
شەھەرنىڭ سىرى
شەھەر دېگەن ئازابلىق ماكان،
ئىس – تۈتۈن، چاڭ – توزان،
رېستوران…
كىچىك چوڭغا قىلمايدۇ سالام.
رەنجىپ يۈرمە ئۇلار ئالدىراش.
ئۆي چېيى، توي چېيى ئالدىراتماقتا،
قىزىلچاچ، سېرىق چاچ، قارا كۆزلەرنى.
ھەممىدە يېڭى ھېس، يېڭى كۆز قاراش،
ۋاقىت يوق، بەك ئېغىر
بالىغا قاراش.
خىزمەت بەك مەززىسىز،
كۆڭۈللۈك پەقەت،
ھەر ئاينىڭ بېشىدا
مائاشنى ساناش.
لېكىن،
باشلىنار نەچچە كۈن ئۆتسە غودۇراش:
«قانداق گەپ، تۆت چايدىن
ئاشمىسا مائاش؟!»
سۈبھى
مەڭگۈلۈك دەقىقە، مەڭگۈلۈك ئازاب،
يەنە كىردىڭ چۈشۈمگە قىزچاق.
ئوغۇرلۇقچە تەلمۈرۈش بىلەن
كۆمىۋەتتىم سېنى قەلبىمگە.
بىلمەيسەن بەلكىم،
سېغىنىشىمنىڭ
سۆيگۈمدەكلا چوڭقۇرلۇقىنى.
قەشقەردىمۇ ياغدىمىكىن قار،
چاچلىرىڭنى سىلكىمە ئەسلا.
ئۇنتۇمىغىن ئارمانلىرىم بار،
ئاڭا قونغان قارنىڭ بەرگىدە.
ھېيىتگاھتا ياڭرىسا ئەزان،
ئويغىنىدۇ قەشقەردە ئارمان.
ئايەم تۇيغۇلىرى
گۈلۈم، مانا بىزنىڭ بايرىمىمىز. زېمىن ئاللاھنىڭ رەھمەت چاچقۇسى بىلەن لىق تولىدىغان دەقىقىلەر، دىللار شاتلىققا پۈركىنىدىغان مىنۇتلار.
مۇبارەك رامىزاندىن پاكلىق نۇرلىرىنى سۈمۈرگەن شەۋۋال ئېيى بىزگە مەخپىي تىلەك تىلەۋاتىدۇ؛ «كۈلگىن، ئەي پاك يۈرەك ساھىبلىرى» دەپ پىچىرلاۋاتىدۇ. سېغىنىشقا لىق تولغان قەلبىم قەلبىڭگە شىۋىرلاۋاتىدۇ: مۇھەببەت- مۆجىزىدۇر. سۆيگۈ مۆجىزىسىگە تولغان يۈرەك خۇنۇكلۈك، پەسلىك بىلەن سىغىشالمايدۇ…
ۋىسال دەملىرى يېتىپ كەلگۈچە كۆزلىرىم كۆزلىرىڭگە، لەۋلىرىم لەۋلىرىڭگە، ۋۇجۇدۇم ۋۇجۇدۇڭغا ھېچنېمە بېرەلمەس.ئەمما، سۆيگۈنىڭ تىلسىماتتەك چىنلىقىدا ھىجران ھوقۇشلىرىنىڭ ھۇۋلىشى ھېچنىمە ئەمەس.
كۈت، گۈلۈم، كۈت. مۇنداقلا ئويلىساڭ كۈتۈشلەر تولىمۇ ئۇزۇن، كۈن ساناپ، ئاي ساناپ، ھىجرانلىق تۈنلەرنى ئۇزىتىش ھەقىقەتەن ئاسان ئەمەس. بىراق،ھەقنىڭ ئۆلچىمىدىكى ياخشىلار جۈملىسىدىن بولماق ئۈچۈن، قەلىبنى قېتى-قېتىدىن پاكلىماق ئۈچۈن زۆرۈر بولغان خىزمەتلەرنى ئويلىساڭ، كۈنلەر ئوقتەك ئۆتىدۇ، كۆزنى يۇمۇپ ئاچقۇچە ھىجران پەيتى پۈتىدۇ…
دىلىمىزغا مۇھەببەت ئوتىنى سالغان پەرۋەردىگار ئۇنى خىرەلىكتىن، گۇمراھلىقتىن ساقلىغاي.
يېقىنقى ئىنكاسلار