ئىمكانسىزلىق

كېچىلەر يوشۇرۇن ئېچىلغان چېچەك،
قەلبىمدە كۆرىمەن ئوتقاش بەرگىنى.
يۇلتۇزلار ئۇنتۇلماس كۆزدىكى چاقناش،
ياش تۆكەر ئۇنتۇماق بولسام گەر سېنى.

شەبنەملەر خىلۋەتتە تۆككەن كۆز يېشىڭ،
مىسرا ياپرىقىدا تۇرار لىغىرلاپ.
ئۇنتۇلغان سېنىڭسىز ئۆتكەن كەچمىشىم،
ئاڭلىغۇڭ كېلىدۇ لېكىن زىغىرلاپ.

ئۇيقۇسىز ئۆتكۈزگەن ھەر بىر كېچەمدە،
شېئىرلار تۆكىسەن قەلبىمگە تەكرار.
ۋەلېكىن قەلەمگە ئالماق ئىمكانسىز،
قىينىما، روھىم ئال، چۈشۈمگە كەت يار.

تىل قادىر بولسىدى دۇردانىلەرنى،
قەلبىمنىڭ تەكتىدىن سۈزۈشكە ھەرئان.
زۇلمەتلىك كېچىدە ياناتتىڭ نۇرلۇق،
شۇ دۇردىن ئاسسام گەر بوينۇڭغا مارجان.

2016-يىل 10-مارت

جاۋاب يېزىش

ئېلېكتىرونلۇق خەت ئادرېسىڭىز ئاشكارىلانمايدۇ.