يۇلقۇنۇش

by دىلمۇرات ئابدۇقەييۇم | فېۋرال 21, 2016 | شېئىرلار

جىمجىتلىق ئىچىدە سىقىلماقتىمەن،
كېچىلەر قوينىغا تىقىلماقتىمەن.
ئەندىشەڭ يىغىشتۇر، يۇمۇۋال كۆزۈڭ،
دولقۇنلار ئەۋجىگە ئۇرۇلماقچىمەن.

سۆكۈلسە چاك- چېكىم كۆپ ۋايىم يېمە،
يېڭى بىر ھاياتچۈن چۇۋۇلماقچىمەن.
سۈكۈتلۈك دەريادا ئىدىم قۇرام تاش،
دۇردانە بولۇشچۈن ئۇۋۇلماقچىمەن.

ئادەتكە ئايلانغان بىرلا خىل ھايات،
يۇلقۇنۇپ سېنىڭدىن قۇتۇلماقچىمەن.
ئارمانسىز ياشاشقا باغلاپ ئىشتىياق،
دۇنياغا يېڭىدىن تۇغۇلماقچىمەن.

2016-يىل 21-فېۋرال

ئىلتىجا

by دىلمۇرات ئابدۇقەييۇم | يانۋار 13, 2016 | شېئىرلار

كۆزىمىز تارتسا گەر ئوخشاش بىر سۈرەت،
قەلبىمىز يۇيىدۇ خىلمۇخىل رەڭدە.
قۇلاقلار ئاڭلىسا ئوخشاش بىر سۆزنى،
قەلبىمىز چۆرۈيدۇ ھەرخىل مەنىگە.

ياشىساقمۇ گەرچە ئوخشاش ھاياتنى،
قەلبىمىز ھېسلىرى تۈرلۈك تۈمەن خىل.
ئەي رەببىم، ھەممىنىڭ ئەسلىنى كۆرسەت،
ئالدىنىش ئىچىدە يايرىمىسۇن دىل.

2016-يىل 13-يانۋار

زارىقىش

by دىلمۇرات ئابدۇقەييۇم | يانۋار 1, 2016 | شېئىرلار

ھۇۋلايدۇ ھەسرەتلەر، ھۇۋلايدۇ بۇ قىش،
ئۇنۇتتۇڭ سەن بەلكىم باھار رەڭگىنى.
ئۆچۈردى زىمىستان گۈلگۈن يۈزلەردىن،
شاتلىقنى، بەخىتنى، نۇرنى، ھەممىنى.

ئۆچۈشنى قەستلەيدۇ قەلبىمدىكى ئوت،
ھېچ نىسىب بولمىدى چىھرىڭگە بېقىش.
شىۋىرغان ئىچىدە تىترەيمەن دىر– دىر،
كۆزۈمدە لىق تۇمان، دىلدا ئەندىكىش.

زۇلمەتتە نىشانسىز يۈرىمەن گۈلۈم،
ئايىغىم ئاستىدا غاچىلدايدۇ قار.
سۈبھىدە ھىدىڭنى ئەپ كەلسە سابا،
يوقىلىپ زىمىستان كېلەرمۇ باھار؟

2016– يىل يانۋار